BINTANGOR: Pengawa negapka jaku Iban begunaka saup ari mayuh piak baik nya ari Opis Menteri Pelajar Malaysia (KPM), Perintah Menua Sarawak, Gerempung Ukai Dikuasa Perintah (NGO), Institusi Pelajar enggau Orang ti ngatika diri ke rinduka jaku nya.
Kenyau ari taun 2008, mata pelajar Jaku Iban keterubah endar bisi ba peresa Sijil Pelajaran Malaysia (SPM), sereta ditangkanka dalam taun 2011, mata pelajar nya berengkah diajar ba Universiti Pendidikan Sultan Idris (UPSI) sereta Palan Pematih Pengajar (IPG).
Taja pia, ba sekeda tikas lebih agi ba raban orang ke gawa perintah,dipeda kurang penampak sereta penegap lebuh ke bejaku Iban.
Pekara nya nyadi ketegal sida tu kurang pengarap lebuh berandau ngena jaku Iban enggau betul sereta ngasi, engkeman enggau konteks sereta maya.
Ulah ke besekat ngena jaku nya deka ngelubahka proses nyungkak sereta mantaika imej jaku Iban ngambika ulih nyadi jaku akedemik ba tikas sekula tauka palan pelajar tinggi nyengkaum palan pematih pengajar (IPG).
Ku Diektor IPG Kampus Rajang, Raymond Gai @ Gaie Panting, laban mensia mayuh ke bedau ulih ngena sistem jaku Iban enggau manah, nya alai bengkel ke diatur IPG Kampus Rajang dikena ngepun sereta negapka guna jaku Iban.
“Nengah pengawa mantaika sistem jaku Iban, ke mungkur senentang sistem nyepil, morfologi sereta mimit ari segi sintaksis, arapka nya ulih negapka pengarap ati raban ke enggau bengkel nya bejaku sereta berandau dalam jaku Iban enggau manah agi.
“Tuju Program nya diatur dikena ngemeran sereta nambahka penemu ngagai orang ti rindu bekena sereta ngempu jaku tu, awakka sida nemu pemesai reti ngena jaku nya enggau betul, sereta ngambika ulih nyadi jaku akedemik lalu nyukung pengawa nyungkak jaku Iban nyadi jaku akedemik enggau penyambung. Kelimpah ari nya mega ngambika juluk ati bansa ke beempuka jaku tu engkeman enggau sempama jaku ke bemunyi, ‘Dikelala buah ari langgu, dikelala bansa ari jaku,” pia ku Raymond lebuh ke berandau enggau pengarang berita, ensanus.
Sesebuah institusi megai tanggungpengawa ke besai bejalaika sereta ngembaika pekara nya baka bengkel ti dikereja IPG Kampus Rajang.
Bengkel nya diatur sehari tu, ba Bilik Seroja IPG Kampus Rajang, berengkah ari pukul 8 pagi sereta disadang tembu urung pukul 4.30 lemai.
Seraban 38 iku masuk ba bengkel nya, nyengkaum (9) iku lecturer,(4) iku pemesai pengatur pengawa enggau (25) iku raban pemantu.
Tukang licha ke bisi ngulu bengkel nya nyengkaum Pemesai ba Bagi Pemansang Kurikulum,Opis Menteri Pelajar Malaysia, Padang Luna ke deka meri licha sentang Sistem Sepil Jaku Iban enggau Chara Ngurup Leka Jaku Iban, Lecturer Jaku Iban IPG Kampus Rajang, Corella Stephen ke deka meri licha sentang Pemun Leka Jaku Iban enggau seiku agi Lecturer Jaku Iban ari IPG Kampus Rajang, Mamat Unggat ke deka meri licha senentang Sistem grammar jaku Iban.
Juluk bengkel tu diatur ngambika meretika sistem sepil jaku Iban sereta ngena nya negah chara ke betul lebuh ke nulis, meretika proses ngepunka leka jaku, raban leka jaku enggau tukuh jaku Iban maya ngena lebuh ke nulis enggau bejaku, lalu ke penudi endar nya meretika sistem grammar jaku Iban sereta ngena nya bejaku ninting hari.
Ku Raymond nengah bengkel nya, arapkaka raban enggau bengkel nya landik agi bejaku Iban sereta sama bela nemu tanggungpengawa negapka chara ngena jaku nya.
“Ari nya mega ulih nyaup negapka pengarap ati mensia mayuh ke bejaku Iban, ngambika sebaka enggau jaku bukai ti nyadika pelasar nyadi jaku akedemik, penyambung, ekonomi, politik enggau pengawa rama.
“IPG Kampus Rajang sebuah ari dua buah IPG ba Malaysia ke bisi program nembiak ba Program Ijazah Sarjana Muda Perguruan (PPISMP) ke major dalam Jaku Iban.
“Beserimbai enggau nya, iya minta nembiak ke udah ngambi peresa Sijil Pelajaran Malaysia (SPM) 2011 tu tadi teulihka pemutus ke manah dalam Jaku Iban, enggau minta program ke diambil Jun 2012 ke deka dibuka enda lama da agi,” ku iya.
No comments:
Post a Comment